Rede de cooperación cos concellos
Presentación
A asistencia e cooperación cos concellos constitúe un eixo estratéxico da actuación deste Goberno Provincial.
O ordenamento local foi decantando ás deputacións provincias como entidades supramunicipaos ás que, ademais de recoñecerlles un ámbito de intereses propios no que se concreta a garantía institucional que toda organización precisa para ser socialmente recoñecible, lles atribúe como misión fundamental a de garantir os principios de solidariedade e equilibrio intermunicipal para asegurar a prestación integral e axeitada na totalidade do territorio provincial dos servizos de competencia municipal.
A Deputación debe asumir, como finalidade institucional básica, ser o soporte da Asistencia e Cooperación cos Concellos -así se recolle na Declaración de Lugo da Comisión de Deputacións, Cabildos e Consellos Insulares da FEMP do 7 de novembro de 2008- de cara a garantir a prestación integral dos servizos públicos de proximidade, que tan decisivamente determinan a calidade de vida dos cidadáns.
As relacións de cooperación e colaboración deben estar presididas polo mutuo recoñecemento entre iguais, principio do que emana a cláusula de participación como condición, entre outras, para unha democracia de calidade, e da que son ferramentas inestimables o diálogo e a concertación que deben animar a nosa acción pública. Acción na que o resultante debe estar sempre presidida pola suma de esforzos.
A articulación da cooperación, como instrumento das políticas públicas dos entes locais dun determinado territorio, demanda unha nova visión da provincia que, superando o vello principio de xerarquía entre concellos/deputacións, a configure como rede de municipios. Rede, na que a Deputación e os Concellos se recoñecen mutuamente como partícipes en pé de igualdade na consecución dos fins públicos para os que naceron.
Nesta perspectiva o Servizo de Asistencia e Cooperación cos Concellos configúrase como un instrumento fundamental e, ao mesmo, queremos dedicarlle os nosos mellos esforzos.
Hoxe, a Deputación acredita unha firme e decidida vontade política de reforzar e ampliar os servizos de asistencia de cooperación cos concellos, como se recolle no Regulamento do servizo que acabamos de aprobar.
José Ramón Gómez Besteiro
Presidente da Deputación de Lugo
|
|
INICIO
MAPA WEB
CONTACTAR 
Actualidade
