A Deputada de Deseño e Artesanía, Regina Polín, o Presidente da Asociación de Amigos do Mosteiro, Carlos Vázquez, presentaron este martes no Centro de Artesanía e Deseño a oitava edición da Feira de Artesanía de Pallares, unha romaría que reúne a preto de 1.000 persoas. A institución luguesa colabora con este colectivo na organización desta feira, que terá lugar o vindeiro domingo, 12 de agosto, no contorno do Mosteiro de Ferreira de Pallares, xa que esta iniciativa enmárcase dentro da aposta da institución provincial polo impulso dos produtos autóctonos e dos oficios artesanais, como sinais de identidade e atractivo da provincia que xeran riqueza. Por este motivo, achegou o 50% do orzamento necesario para a celebración da VIII convocatoria deste festexo, uns 2.000 euros concedidos mediante o Plan Estratéxico de Subvencións do INLUDES.

Regina Polín, incidiu que “é necesario manter citas como esta, que contribúen a dar conta do valor engadido dos oficios artesanais e da gastronomía lucense ós milleiros de persoas que nos visitan durante a época estival, potenciando no exterior ambos os dous sectores co obxectivo de acadar novos beneficios e manter postos de emprego na provincia”.

Artesanía e gastronomía
Os actos, que se celebran dende 2004, arrancarán pola mañá, ás 09:00 horas, coa instalación de 30 postos que acollerán o traballo doutros tantos artesáns de Guntín, Monterroso e Cambre. Os visitantes poderán ver en vivo ó completo proceso de elaboración de pezas artesanais de cestería, ferrería, olería, ebanistería ou apicultura. Ademais, todos os que se acheguen a esta localidade lucense, terán a oportunidade de ver en directo unha recreación de cociña tradicional onde aprenderán a facer queixo de xeito artesanal. Paralelamente á demostración dos artesáns, 3 filloeiras prepararán dende primeira hora da mañá centos de filloas, que se poderán degustar gratuitamente a partir das 13:00 horas.

Xantar e malla veciñal
Na cita, celebrarase tamén unha comida de confraternidade que terá un custo de 22 euros para os socios e 24 os non socios. Complementan a programación un pregón que conmemorará e honrará ós antepasados de Guntín, que defenderon o mosteiro en época de guerra e unha cerimonia relixiosa; ademais dunha malla veciñal. Precederá a estas actividades unha sega común e unha comida popular que terá lugar o mércores na parroquia de Vilamelle de Frameán.